Brúðkaupið var frábært, gestir úr öllum áttum: fjölskylda brúðarinnar frá Svíþjóð, vinir beggja frá Noregi, fjölskylda brúðgumans og vinir frá Glocester, "foreldrar" brúðarinnar frá skiptinemaári í Boston, vinur gumans frá Ástralíu. Því var kátt á hjalla og gaman að sjá hvernig brúðkaupshefðum Englands og Svíþjóðar var blandað saman.

Sjálf athöfnin var kl 13 og fór fram í kapellunni í Corpus Christi College. Mjög falleg, gömul kapella þar sem fólk situr meðfram hliðarveggjunum. Það var því gott útsýni yfir brúðina þar sem hún gekk inn kirkjugólfið, fallegri en nokkru sinni. Og það segir nú mikið þar sem hún Ingela er alveg sérstaklega falleg ung kona!

Eftir athöfnina var drukkið kampavín brúðhjónunum til heiðurs í garði hjá skólanum áður en brúðhjónin og gestirnir héldu niður að ánni Cam þar sem allir settust í báta og sigldu um ána (kallað 'punting') og heyrðu um sögu þeirra bygginga sem standa við hana. Því næst var haldið í St Cathrine's College þar sem sjálf veislan fór fram. Fyrst var drukkið aðeins meira kampavín og gjafir opnaðar áður en sest var til borðs. Þar var búið að raða gestunum fyrirfram og sat ég til borðs með svaramanninum sem heitir Anna. Við hvern disk var svo lítil bók þar sem sjá mátti matseðil kvöldsins og síðan lista yfir alla gesti, hverjir þeir væru, tengsl þeirra við brúðhjónin og ábendingar um umræðuefni. Mjög sniðugt!

Maturinn var auðvitað frábær: fyrst aspassúpa og síðan lax í forrétti, fyllt perluhæna í madeirasósu í aðallrétt og svo ís með karamellusósu í eftirrétt. Að borðhaldi loknu var barinn opnaður, m.a. boðið upp á bjór sem ættingi brúðgumans bruggar sjálfur fyrir pöbbinn sinn í Glocester, þjóðlagadúett á hans vegum lék írsk lög og skapaði þannig enn betri stemmningu. Þegar leið á kvöldið voru síðan heimatilbúnir geisladiskar brúðarinnar settir á fóninn og dansað við Abba, diskó og sænska júróvísjóntónlist fram á nótt.

Tilraun til að halda á skemmtistaði eftir þetta misheppnaðist af orsökum sem ég ætla ekki að fjalla um hér - segi ykkur frá því prívat ef þið viljið - og því hélt fólk til sinna gististaða. Sjálfur gisti ég hjá yndælli konu, vinkonu og fyrrverandi kennara brúðgumans, sem heitir Kari og á hún þrjá gullfallega ketti og sexþúsund bækur! Svaf ljómandi vel til hádegis og eftir tveggja tíma spjall var tími kominn til að halda á lestarstöðina.

Það er ekki eitt heldur allt. Þegar ég kom heim og ætlaði að hanga í tölvunni í leiðindarigningunni sem var í gærkveldi þá var bara engin nettenging! Það hafði nefnilega orðið skammhlaup í byggingunni og það olli því að netþjónninn hrundi og ekki hægt að gera við fyrr en í morgun. En nú er allt sem sé í fínu, þannig að ég ætti að geta tölvast í kvöld.

Annars er ég búinn að vera sérdeilis duglegur að transskríbera í gær og í dag og það lítur allt út fyrir að ég nái að klára það sem ég er akkúrat að vinna með áður en ég fer til Íslands, var nú orðinn nokkuð vonlítill eftir að missa út föstudag, mánudag og þriðjudag vegna viðgerðar. Verð auðvitað að halda mig við efnið á morgun, mánudag og þriðjudag og þá ætti þetta að hafast.

Skrapp síðan á Oxford Street eftir vinnu, keypti mér svart bindi og hvíta skyrtu fyrir brúðkaupið á laugardag. Já, það er sem sé komið að því sem ég er búinn að hlakka til í langan tíma: brúðkaupi Ingelu og Tims í Cambridge. Keypti líka kort til að láta fylgja með gjöfinni, sem ykkur að segja er smáaur upp í brúðkaupsferðina þeirra. Já, þau búa nefnilega í Osló og hafa eflaust nóg að bera heim og óskuðu sér helst brúðkaupsferðar. Skil þau vel!

Og í dag er sem sé vika í heimferð. Er einhver búinn að lesa Harry Potter sem er tilbúinn að ræða við mig ákveðið atriði??? Lýsi hér með eftir HP-félaga! Linda er byrjuð, veit ég, en hún er svo lengi að lesa að það verður ábyggilega ekki fyrr en um jól að hún verður tilbúin!

Tölvan er komin heim úr viðgerð og nokkuð fyrr en ég átti von á. Þetta var sem betur fer ekkert alvarlegt. Ég get því haldið áfram handritagrúski á British Library en það hefur augljóslega verið ómögulegt án tölvunnar undanfarna daga!

Eftir allt þruglið með hreingerningar á íbúðinni hér í upphafi dvalarinnar í London verð ég nú að skrifa smáhrós um meðleigjandann. Honum tókst nefnilega að finna jafngildi vítissóda til að þrífa gula botninn í klósettinu. Ég hálfhrökklaðist út af baðherberginu þegar ég sá skjannahvítan klósettbotninn! Við erum sem sé búnir að vera að prófa hin ýmsu efni - án árangurs þangað til núna. Áfram Sanjog!

Tølvan mín blessunin lagdist í dá á fimmtudagskvøldid og netvirkni mín hefur tví ordid fyrir nokkrum truflunum. Hún er tó sem betur fer innan ábyrgdar og verd ég ad vona ad bilunin sé ekki mér ad kenna. Var sótt á føstudag og ég fæ vonandi fréttir af henni tegar lídur á vikuna. Tad má tví gera rád fyrir ad pistlar verdi nokkud fáir hér enda tykir mér hundleidinlegt at vera í almenningstølvunum hér á gardinum.

Skrapp á stóra skemmtun í Finsbury Park í gær tar sem ég sá vinkonurnar í Bananarama troda upp auk audvitad Frankie Goes to Hollywood. Medal annarra má svo nefna Tony Christie gamla, Peter Andre og Girls Aloud. Gestakynnar voru tó nokkrir: Graham Norton sem er fyndnastur og svó mætti sjálf Jordan - sem nú vill bara kalla sig Katie Price - á svidid!! Gott gaman og vel 15 pundanna virdi (midinn átti reyndar ad kosta 40 pund en ég var svo heppinn ad tar sem ég stód í rødinni voru stelpur fyrir framan mig med aukamida sem tær seldu mér á algjøru tilbodsverdi!

Var að klára bókina og er svo að segja í pínusjokki yfir því sem þar gerðist. Að vissu leyti koma endalok ákveðinna persóna ekki á óvart en það er samt flott hvað Rowling tekst að halda manni í óvissu um hvað maður eigi að halda um fólk og atburði. Og hvað allt fléttast vel saman við það sem hefur gerst í fyrri bókum! En þar sem ég vil ekki skemma allt of mikið, vil ég bara segja að ég get líka séð að allt er þetta nauðsynlegt fyrir lokabardagann í síðustu bókinni!

Búinn að ganga frá heimferð að kvöldi 4. ágúst! Það er fimmtudagur. Hlakka til!

Byrjaði að transkríbera texta frá handriti BL Add 11,158 í dag og hef þar með formlega hafið vinnu á þrepi tvö í verkefninu: Efnisöflun. Gekk ágætlega, þokkalega læsileg rithönd og á vonandi ekki eftir að taka allt of langan tíma! Ánægður með mig

Vinnan gengur sem sé ágætlega! Byrja á morgun að skoða þau fáu íslensku handrit sem eru á British Library og koma verkefninu mínu við. Á fimmtudaginn var tók ég þátt í pallborðsumræðum á UCL. Aðalumræðuefnið var tengd alþjóðavæðingu skólans, u.þ.b. helmingur nemenda á pallinum voru nemar sem höfðu farið sem skiptinemar til annarra landa og við hin vorum útlendingar við skólann. Það var leiðbeinandinn minn sem mælti með mér og það gekk ljómandi vel. Kom vel frá mér mínum sjónarmiðum án þess að vera of persónulegur í ákveðnum málum!

Það hefur reyndar verið dálítið skrýtið að vera niðri á British Library, þar eru enn fullt af myndum af fólki sem er saknað eftir sprengingarnar, reyndar hef ég síðan séð myndir af flestum þeirra í blöðunum þar sem dauði þeirra er staðfestur. Setur að manni trega!

Helgin er svo búin að vera fín. Rólegheit almennt en svona stress í nokkrum fyrrnefndum málum (sjá eldri pósta) sem ég vona að séu að reddast. Keypti Harry Potter í dag og er aðeins byrjaður að lesa í henni! Er farinn að hlakka mikið til að koma heim. Gay Pride, danskir dagar og sumarbústaður með Marteini!

Síðbúnar afmæliskveðjur til frænkna minna Signýjar og Þóru. Signý átti afmæli 7. júlí, sama dag og Krummi frændi hefði orðið 51 árs. Þóra átti svo afmæli á föstudaginn og núna er bara eitt ár í stórafmælið hennar! Vona að þær báðar hafi notið dagsins!

Það var notalegt að vera í Köben um helgina. Það var náttúrlega ansi mikið sjokk að sjá fréttirnar af hörmungunum hér í London. Þegar maður er á ferli í borginni án þess að verða vitni að öðru en samgöngutruflunum áttar maður sig svo illa á því sem hefur gerst og það var ekki fyrr en ég sá sjónvarpið að ég fattaði hvað hafði gerst!

Eftir smámatarboð á fimmtudagskvöldinu heima hjá Mette fór ég á Árnasafn og hitti fólk og vann aðeins. Náði að gera það sem ég ætlaði mér en það verður nú að viðurkennast að stór hluti dagsins fór í spjall, bæði um atburðina í London og svona almennt hvernig gengi með verkefnið. Og svona ykkur að segja, það gengur ágætlega. Eftir vinnu settumst við með bjór í góða veðrið, fyrst við háskólann á Amager og síðan niður á Islands Bryggju, þar sem Svenni bættist í hópinn. Síðla kvölds fórum við svo aðeins á Oscar og hittum þar Þórhildi og Álfheiði fyrrverandi samkennara mína úr Húsaskóla, og við Svenni fórum með þeim á skemmtistaðinn Absalon á Strikinu. Þangað hafði ég aldrei komið áður og efast um að ég verði mikið þar í framtíðinni. Hló samt mikið að kúnnahóp staðarins. Við Álfheiður fórum nefnilega aðeins á dansgólfið og þar sem við bæði erum sérlega hávaxin gnæfðum við yfir alla þar!

Á laugardaginn heimsótti ég Sanne og Jørgen, gamla vini mína af Grönjordskollegíinu. Þau eru flutt í huggulega íbúð í Herlev ásamt nýfæddri dóttur sinni. Hún fæddist 26. júní og heitir Ea. Það var ljómandi gaman, Ea svaf allan tímann sem ég var þar, m.a. lengi í fanginu á mér, og við borðuðum heimatilbúinn ís og jarðarber.

Á laugardagskvöldið héldum við Mette síðan partý fyrir vini okkar og kunningja og þar var góður hópur fram undir morgun. Þrátt fyrir það komum við okkur á fætur um hádegið daginn eftir, tókum til og borðuðum koldskål, sem er svona hrærð súrmjólk með sykri og (yfirleitt) eggjum og borðuð með kammerjúnkum. Voðahressandi í hitanum. Að því loknu lölluðum við okkur á Hellerup-ströndina þar sem við lágum aðeins og syntum í sjónum. Mjög næs, sérstaklega þar sem ég náði að lokka hana í burtu áður en ég varð að rjúkandi rúst!

Um kvöldið fórum við Mette svo með Svenna og Christian út að borða á Christianshavn. Fengum þar verstu þjónustu í heimi en matseðillinn var svo girnilegur að við létum okkur hafa það að bíða í hálftíma eftir að fá að panta hann! Á eftir fengu Svenni og Mette sér svo ís á Amagerbrogade og við kíktum í örstutta óvænta heimsókn til Diljár og Kristins. Gat náttúrlega ekki misst af því að sjá kúluna á henni! Og hún er sem sé sett á afmælisdaginn minn, 20. nóv.!

Tók því svo nokkuð rólega í gær áður en ég fór út á flugvöll - flugið var ekki fyrr en kl 18 að dönskum tíma. Hitti Svenna og kíkti við á Árnasafni. Það var síðan eðlilega nokkuð vesen að komast heim af Heathrow. Piccadilly-line gengur ekki eins og vanalega út af sprengingunum og ég þurfti því að skipta tvisvar um lest til að komast heim, og fara heldur lengri leið í þokkabót. Það tók því á endanum ögn lengri tíma að komast heim af Heathrow heldur en samtals ferðin út á flugvöll í Köben og flugið til London! Hef samt lítið hitt af fólki og lítið upplifað hvaða áhrif sprengingarnar hafa á daglegt líf hér í borg. Kemst líklega að því í dag og næstu daga!

Veit ekki hvar ég á ad byrja! Verd ad vidurkenna ad ég var feginn ad fara til Køben tessa helgi. Frétti fyrst af tessum árásum tar sem ég var ad koma mér á fætur ádur en ég kom mér á stad út á flugvøll - ætladi mér audvitad at taka nedanjardarlestina tangad - og turfti ad finna tad út sem var audveldast. Vissi ad Heathrow Express fer frá Paddington og nádi strætó tangad frá Camden en tad tók nú tímann sinn eins og gefur ad skilja! Skilst ad ég hafi nád næst sídustu lest út a vøll ádur en Paddington stødinni var alveg lokad. Kom reyndar tokkalega á óvart ad vélin til Køben var full vid brottfør!

Hef reyndar aldrei upplifad adra eins samkennd hjá strætófartegum! Menn sem aldrei hefdu talad saman sátu í strætó voru bestu vinir og spjølludu saman í langan tíma!!! En tad á ekki ad turfa svona til!!!

Hæ øll, tad er i lagi med mig og eftir hellingsvesen vid ad komast a flugvøllinn nadi eg tvi og er nu i Køben! Tetta er annars hryllilegt og klarlega i tengslum vid OL-akvørdunina i gær. Læt meira heyra i mer sidar!

Og London varð fyrir valinu ýmsum á óvart. Ég verð þó að viðurkenna að ég átti alltaf von á að við (já við ) yrðum fyrir valinu! Svo mikið hefur verið framkvæmt undanfarin ár til að sýna fram á alvöru vilja til að halda Ólympíuleikana. París er reyndar með allt sitt tilbúið út af HM í frjálsum fyrir tveimur árum - en það dugir ekki bara ekki að vera sigurviss mörgum mánuðum fyrir kosninguna. Og ég held í alvöru að forsetadruslann þeirra hafi gert útslagið með kjaftagangi um gæði enskrar og finnskrar matargerðarlistar (eða skort þar á)! En við fögnum!

Og Köben á morgun!!!

er saga sem margir lesa í skóla. Ég var því miður ekki einn af þeim. Einhverra hluta vegna varð Íslandsklukkan alls staðar fyrir valinu hjá íslenskukennurunum mínum hér áður fyrr þegar átti að lesa Laxness. Og hana las ég sem sé þrisvar á skólaferlinum - fyrsta hlutann í grunnskóla og svo allt verkið í MR og Kennó. Eftir að hafa komið upp um þá fávisku mína að hafa ekki lesið Sjálfstætt fólk, í vellesnum hópi fólks af Hugvísindastofnun Háskóla Íslands í rútuleik þar sem maður safnar stigum á því að nefna bækur sem maður hefur ekki lesið en hinir hafa, þá ákvað ég að úr þessu þurfti að bæta!

Það verður nú samt að viðurkennast að tók mig ansi langan tíma að lesa verkið. Byrjaði í ágúst fyrir tveimur árum, u.þ.b. sem ég fór í hálskirtlatöku á danska ríkisspítalanum. Hef svona verið að taka í bókina við og við síðan en það er ekki fyrr en í strætóferðum hér í London (sem eru kjörnar til lestrar) að ég kemst eitthvað áfram og núna þegar ég kom heim áðan átti ég svo lítið eftir að ég bara varð að klára hana. Þannig að nú get ég loksins sagst vera búinn að lesa Sjálfstætt fólk!

Miðað við hvað lesturinn tók langan tíma gæti maður haldið að mér hafi þótt sagan leiðinleg. Og það er svo sem rétt á köflum, Bjartur í Sumarhúsum og misskilið sjálfstæði hans fór mjög svo í taugarnar á mér og það varð ekki fyrr en í síðasta hlutanum sem mér fannst sagan fara á eitthvað flug. Og í raun kemur það mér á óvart hvað ég er sáttur við hana núna þegar ég er búinn. Held meira að segja að ég væri til í að keyra hratt yfir hana svona til að ná heildinni betur. Sé til!

Já, dagurinn byrjaði nú ekki vel vinnulega séð, en það rættist nú það vel úr honum að afraksturinn varð meiri en flesta aðra daga. Fann nokkur "ný" handrit og jafnvel "nýja" gerð þeirrar sögu sem ég er að skoða þessa dagana. Vil nú ekki ljóstra atvinnuleyndarmálum hér á síðunni en er verulega ánægður með sjálfan mig og um leið þokkalega þreyttur!

Vil bara benda fólki á þátt Harðar Torfa, Sáðmenn söngvanna, sem var á Rás 1 í morgun. Þar fjallaði hann um Vilhjálm Vilhjálmsson. Er að hlusta á hann núna og þetta er alveg frábær þáttur!

Og úr því að ég er að mæla með útvarpsþáttum, þá vil ég líka nefna þáttinn hennar Lönu, Plötuskápinn, frá föstudeginum 24. júní þar sem hún fjallaði um ABBA. Alveg æði - og er að finna á www.ruv.is þangað til á föstudag.